Россияда PlayStation 4 ўғирлашга бўлган уриниш муштлашув билан тугади

Россиянинг Екатеринбург шаҳрида 22 январь куни содир бўлган воқеа интернетда катта шуҳрат қозонди. Уч номаълум шахс эълон бўйича PlayStation 4 сотиб келган Александр исмли эркакнинг мулкига кўз олайтирган.

Учрашувга бориш олдидан жиноятчилар ўзларининг Nissan Teana машинасидан рақамни ечиб олишган. Консолларни болаларига сотиб олаётганларини айтган эркаклар ундан подъед олдида кутиб туришни сўрашган.

20-25 ёшли ўғрилар келиб, сотувчи гап қотиши билан уни ерга йиқитиб калтаклай бошлашган.

Аммо воқеа жойига яқин ерда ишлаётган электриклар шовқинни эшитиб, ёрдамга етиб келишган.

Улардан бири машинага сакраб, ҳайдовчини дўппослай кетган, қолганлари эса сотувчига ҳужум қилган икки йигитни тепкилаган.

Жиноятчилар машинага ўтириб қочмоқчи бўлишганида Александрнинг қўшниси Вадим югуриб келиб, машина капоти устига чиқиб олган олд ойнани синдирган.

Ўз навбатида, электриклар жабрланган сотувчи билан бирга машинанинг олд эшигини очишган ва автомобиль қор уюмига тиқилиб қолган.

Ўғрилар машинадан тушиб, “Нима қиляпсизлар? Бу машина неча пул туришини биласизларми?”, деб сўрашган.

“Ҳозир полиция келса, машина эсларингдан чиқиб кетади”, - деган жабрланувчи. Шунда ўғрилар машинага миниб, қочиб кетишган.

Воқеаларнинг кўп қисми бир қанча кузатув камераларига ёзиб олинган. Александр жиддий жароҳат олмаган, бундан ташқари, 22 минг рублли консолни ҳам сақлаб қолган. Полиция талончиларни қидирмоқда.