2016 йилда Қирғизистонда 2 млн та янги дарахт экилади

2016 йилда Қирғизистонда турли навдаги 2 млн та янги дарахт экилади, деб маълум қилди Қирғизистон бош вазири Темир Сариев.

Сариевнинг айтишича, Қирғизистон атроф-муҳитни муҳофаза қилиш ва ўрмон хўжалиги давлат агентлигига ушбу масалани ҳокимият идоралари билан ишлаб чиқиш вазифаси топширилди. “Бишкек чиройли ва тоза, бошқа шаҳарларга ўрнак бўладиган шаҳар бўлиши керак, ахир у пойтахт”, деб айтди Сариев.

Бишкек мэрияси маълумотларига кўра, 2015 йил 1 декабрь ҳолатига кўра, Бишкекда дарахтзорлар 4 минг 887 гектар майдонни эгаллаган. 2015 йилда Бишкекда 6 минг 204 та игнабаргли ва япроқли дарахт навлари кўчати, 243 та бута, 16 мингта иҳота ўсимликлари экилган. Шу билан бирга 835 та қуриб қолган ва хавф туғдирувчи дарахтлар кесиб ташланган.