Megadeath гуруҳининг собиқ барабанчиси саҳнада жон берди

Megadeath рок-гуруҳининг собиқ барабанчиси 51 ёшли Ник Менца 22 май куни, саҳнада вафот этди. Бу ҳақда Associated Press хабар тарқатган.

Мусиқачининг менежери Роб Болжернинг айтишича, у Лос-Анжелесдаги клублардан бири Baked Potato клубида, OHM гуруҳи билан чиқиш қилиш вақтида жон берган. У саҳнада ҳушини йўқотиб йиқилган ва қайтиб турмаган.

Унинг ўлимига юрак хуружи сабаб бўлгани айтилган.

Менцанинг биографи ва дўсти Жей Маршалл Крейгнинг ҳикоя қилишича, "Никнинг ҳали режалари кўп эди". У MenzaLife автобиографияси устида иш олиб бораётган, бу асар июнь ойида чиқиши кутилаётганди.

Менца илк марта Megadeth гуруҳи билан 1988 йили Англиянинг Брэдфорд шаҳрида чиқиш қилган. 1989 йили у гуруҳнинг учинчи барабанчисига айланган ва Rust in Peace, Youthanasia, Cryptic Writings ва Countdown To Extinction альбомларида ишлаган.