ХХР ТИВ Ҳаага ҳакамлик судининг Филиппин аризаси бўйича чиқарган хулосасига нисбатан расмий баёнотини эълон қилди. Унга кўра, Жанубий-Хитой денгизидаги тортишувли оролларга оид суд қарори Хитойнинг ушбу денгиз ҳавзасидаги манфаат ва суверенитетига таъсир кўрсатмайди.
«Бу каби суд қарори, Хитойнинг Жанубий-Хитой денгизидаги ҳуқуқ ва манфаатларига ҳар қандай ҳолатда ҳам таъсир кўрсата олмайди. Хитой ушбу маҳкама хулосасига қарши чиқади ва унга асосланган талаб ёки ҳаракатларни ҳеч қачон қабул қилмайди», — дейилади вазирлик баёнотида.
Аниқлик киритилишича, расмий Пекин ҳудудий тортишувлар ва денгиз чегаралари белгиланишини учинчи томон ҳал этиши имкониятини рад этади.
Аввалроқ, Ҳаага халқаро ҳакамлик суди, Хитой Жанубий-Хитой денгизидаги можароли ҳудудларга тарихий жиҳатдан даъво қила олмаслиги хусусида қарор чиқарган эди.
