Қозоғистонликлар Биринчи Президент Кунини нишонлашмоқда, деб хабар қилади Tengrinews.kz. Мамлакатнинг барча туманларида байрам тадбирлари ўтказилмоқда.
Эслатиб ўтамиз, ҚР Сенати 2011 йилда бундай байрамни таъсис этиш тўғрисида қонун қабул қилган.
Толдиқўрғонда Биринчи Президент кунига атаб Назарбоев ҳайкали очилди. Шунингдек, парламент депутатлари Қозоғистон пойтахти номини ўзгартиришни ҳам таклиф қилишди. Аммо давлат раҳбари бунга қарши чиқди.
Бугун эса ҚР Миллий банки юбилей банкноталарни муомалага киритди. Назарбоев тасвирланган эсдалик банкнотаси кўк-мовий рангда тайёрланди.
Маълумот учун, Нурсултон Назарбоевнинг биринчи инаугурацияси 1991 йилнинг 10 декабрь куни ўтказилган. У Олмаотадаги Республика саройида Олий Кенгаш депутатлари иштирокида бўлиб ўтган.
Маросимда ҳарбий парад ва кортеж бўлмаган. Президент ҚР Конституциясига қўлини қўйиб, мамлакат халқига қасамёд қилган.
Шундан сўнг эса унга ҚР Президенти гувоҳномаси топширилган. Ўшандан бери бешта шундай маросим ўтказилди.
