"Википедия"да 2016 йилда энг кўп таҳрир қилинган мақолалар аниқланди

"Википедия" 2016 йилда энг кўп таҳрир қилинган мақолалар рўйхатини тақдим қилди. Бу ҳақда Digital Trends хабар бермоқда. 

Интернет-ресурс маълумотларига кўра, 2016 йилда ҳаётдан кўз юмган машҳур одамлар: қўшиқчи Дэвид Боуи, боксчи Муҳаммад Али, фазогир Жон Гленн ва бошқалар ҳақидаги мақолалар энг кўп таҳрир қилинган. Умумий ҳолда "2016 йилда вафот этганлар" тоифасидаги материаллар 18230 марта ўзгаришларга учраган.

Кейинги 4 та ўринни сиёсий воқеалар билан боғлиқ мақолалар эгаллаган. Мисол учун, Дональд Трамп ҳақидаги мақола 8933 марта таҳрир қилинган. Шунингдек, бу рўйхатга "АҚШдаги президент сайловлари", "Хиллари Клинтон президентлик кампаниясини қўллаб-қувватлаш" ва "Республикачилар партияси "президентлик" праймеризлари" мақолалари кирди.

Бундан кейин рейтингда Орландодаги Pulse клубида содир этилган отишма ҳақидаги мақола келмоқда (5540 марта тузатиш). 7-ўринни Аргентинадаги энг узоқ давом этган рақс мусобақасининг охирги мавсумига бағишланган "Bailando 2015" номли мақола эгаллаган (5432 марта тузатиш).

Эътиборлиси, 10-ўринни "Жанубий Корея мусиқаси 2016" мақоласи (5074 марта тузатиш), 12-ўринни эса рассом Винсент Ван Гог ҳақидаги мақола (3551 марта тузатиш) эгаллаган.