Америкалик генерал: АҚШга танклар керак, худди Россияникидек

Америкалик истеъфодаги генерал Уэсли Кларкнинг фикр билдиришича, АҚШ Қуролли кучлари модернизация бобида Россия ва Хитойдан ортда қолмоқда. У АМ 970 радиоси эфирида шу ҳақида гапирган.

Унинг қайд этишича, кейинги ўн йилликда Пентагон Яқин Шарқдаги зиддиятлар учун зарур қуролларга пул сарфлади. АҚШ вертолётлар, самолётлар ва ўқ-дорилар сотиб олиш учун харажат қилди.

Россия эса бу вақтда зирҳли техникаларнинг янги авлодини яратди. Кларкнинг сўзларига кўра, бу америкалик ҳарбийларда ташвиш уйғотмоқда.

"Россияда асосий жанговар танк Т-14 бор. Бу қаттиқ ҳимояланган ва экипаж ҳимояси таъминланган танкдир. Бу танкда бизнинг танкларда йўқ жиҳатлар мавжуд. Бу биз 2030 йилгача эга бўлишни режалаштирган танкдир. Бизга худди шундай танклар керак", деган генерал.

У шунингдек, Россиянинг ракетага қарши мудофаа тизими, жумладан С-400 зенит-ракета мажмуаси имкониятларини юқори баҳолаган.

"Бундай тизим жойлаштирилган ҳудудларда энди АҚШ муваффақиятга эриша олмайди. Уни айланиб ўтишнинг имкони йўқ", дея қайд этган Кларк.

Генерал америкаликларнинг дронлари россияликларнинг радиоэлектрон курашдаги воситалари қаршисида ожиз эканига эътибор қаратган.

"Биз мураккаб техник тизимлар яратдик, аммо уларнинг алоҳида заифликлари мавжуд", — деган у.

Генералнинг фикрича вазиятни ўнглаш учун қуролли кучларга қўшимча инвестициялар жалб этилиши керак бўлади.