Американинг Ford компанияси дилерлик марказларида техник хизмат кўрсатишнинг янги усулини ўйлаб топди. Ишлаб чиқарувчи Panasonic компаниясининг Шимолий Америкадаги шўъба корхонаси билан ҳамкорликда SmartService Kiosk терминалини ишлаб чиқди. У техник хизмат кўрсатиш рўйхатига ёзилиш жараёнини енгиллаштиради.
Терминаллар техник хизмат кўрсатишни автоматлаштиришга ёрдам беради. Улар кечаю-кундуз ишлайди, машина калитини қолдириш ва олиш имконини беради. Унда зарурий хизматни танлаш ҳамда бажарилган хизмат учун пластик картада тўлаш мумкин. Калитни топширгач, машина эгасининг электрон почтасига
QR-кодли мактуб келади, уни машинани олиш вақтида сканердан ўтказиш талаб этилади.
Янги терминаллар шу йилнинг январь ойидан Мичиган штати Бирч Рандаги дилерлик марказларидан бирида синовдан ўтказилмоқда. Шундан сўнг, терминаллардан тижорий фойдаланиш хусусида якуний хулосага келинади.
