Таймазов Пекин олимпиадаси олтин медалидан маҳрум қилинди

Халқаро олимпия қўмитаси расмий сайтида чиққан маълумотга кўра, Пекин-2008 олимпиадасида юртимиз шарафини ҳимоя қилган ва эркин кураш мусобақасида олтин медални қўлга киритган Артур Таймазовнинг эришган натижаси бекор қилинган.

Таймазов топширган допинг-намуналарда туринабол ва станозолол каби тақиқланган моддалар топилган. Энди 120 килограмгача бўлган вазнда финалда Артур Таймазовга ютқазиб, кумуш медал билан тақдирланган россиялик курашчи Бахтиёр Аҳмедов Пекин олимпиадаси чемпиони ҳисобланади. Пекин-2008 бронза медали соҳиблари словакиялик Давид Мусулбес ва қозоғистонлик Марид Муталимов эди.

Эслатиб ўтамиз, Пекин олимпиадасида юртимиз қўлга киритган ягона олтин медални айнан Артур Таймазов олиб берган эди. 

Шунингдек, ХОҚ Пекин олимпиадасида 60 кг вазнда финалга чиқиб кумуш медални қўлга киритган украиналик Василий Федоришиннинг ҳам организмидан туринабол топиб, уни ҳам медалдан маҳрум этган. Бу вазнда бронза япониялик Кэнити Юмото ва эронлик Мурод Муҳаммадийга насиб этган эди.

Афина-2004 олимпиадасида ҳам олий шоҳсупага кўтарилган Таймазов Пекиндан сўнг Лондон-2012 олимпиадасида ҳам олтин медални қўлга киритиб, тарихда учта олтин медални қўлга киритган учинчи курашчи бўлган эди: унгача бундай натижага Александр Медведь (1964, 1968, 1972) ва Бувайсар Сайтиев (1996, 2004, 2008) эришишган эди.