Елизавета II’нинг турмуш ўртоғи «ишдан кетади»

Эдинбург ҳерцоги, Буюк Британия қироличаси Елизавета II’нинг турмуш ўртоғи шаҳзода Филипп шу йилнинг кузида қироллик мажбуриятларидан бутунлай озод этилади. Ушбу ташаббус унинг ўзи томонидан билдирилган ва қиролича томонидан маъқулланган.

Қайд этиш керакки, шаҳзода шу йил июнида 96 ёшга чиқади.

У шундан кейин расмий маросимларда иштирок этмайди. 

«Шаҳзода Филипп август ойига белгиланган маросимларга қиролича ҳамроҳлигида ташриф буюради. Шундан сўнг ҳерцог янги таклифларни қабул қилмайди ва унинг омма олдида чиқишини кам кўра бошлаймиз», - дейилган Букингҳэм саройи берган хабарда.

Бундан олдинроқ Елизавета II’нинг шахсий котиби Кристофер Гейдт қироллик хонадон хизматчиларининг барчасини шошилинч равишда Лондонга чақиргани, бунинг ортидан фавқулодда хабар эълон қилиниши кутилаётгани ҳақида хабар берилганди.