ТАТУни танқид қилган абитуриент ўз айбловига раддия берди

Бугун Кун.uz сайти орқали “Абитуриент фикри: ТАТУдаги “маслаҳатчи”лар ўз сайтини ўқиб турса, яхши бўларди...” сарлавҳаси остида мақола эълон қилинган эди. Унда ТАТУга ҳужжат топширгани борган мақола муаллифи – Хайриддин Баҳромхўжаев олий ўқув юрти сайтида кўрсатилган вақтга қараб қабул комиссиясига боргани, у ердагилар қабул тугаганини айтишгани, ҳужжатлардан айб топиш учун атай текширишгани ва бошқа ҳолатлар тасвирлаб берилган.

Мақола эълон қилинганига кўп ўтмай, Хайриддин Баҳромхўжаев ижтимоий тармоқ орқали ўз ёзган мақоласига қуйидагича раддия берди: “Мен 30 июнь куни қабул комиссиясига ростан ҳам кеч борганим учун тушунмовчилик бўлиб қолди. “Острочка”га келсак, у ҳужжат топшираётган ҳар бир абитуриент томонидан қабул комиссиясига нусхаси топширилиб, аслини кўрсатиш керак экан. Бу постни жаҳл устида ёзганман. Бу учун ТАТУ вакилларидан узр сўрайман”.