Аргентинанинг коррупцияда гумонланаётган собиқ президенти сенатор бўлди

Аргентинада 22 октябрда ўтган сайловлар натижаларига кўра мамлакатнинг собиқ президенти Кристина Фернандес де Киршнер парламентнинг юқори палатаси – сенатга сайланди.    

Собиқ президент сайловларда Буэнос-Айрес вилоятидан иштирок этган. Сайловларнинг дастлабки натижаларига кўра, у ташкил этган "Фуқаролик бирдамлиги" альянси вилоятдаги сайловларда 2-ўринни олди ва шу тариқа сенатда бир ўринга эга бўлди. 

Сенаторлик мандати де Киршнерга парламент дахлсизлигини кафолатлайди. Айни вақтда унга нисбатан коррупция ва марказий банкда фирибгарликлар бўйича учта жиноий иш қўзғатилган. Бундан ташқари, прокуратура собиқ президентни 1994 йилда яҳудийлар марказида содир этилган теракт терговига қаршилик қилишликда гумон қилмоқда. Парламент дахлсизлиги де Киршнерни суд таъқибидан қутқара олмайди, лекин унинг ҳибсга олинишидан ҳимоялайди.

Сайловлар натиижаларига кўра депутатлар палатасидаги 257 ўриндан 127 таси ва сенатдаги 72 та ўриндан 24 таси янгиланади. Айни вақтда бирорта партия парламентнинг иккала палатасида ҳам мутлақ кўпчиликка эга эмас.