Уч ўлчовли (3D) босманинг тиббиётда қўлланиши ҳақида анчадан бери гапириб келинмоқда ва бу мавзу бўйича кўплаб тадқиқотлар ўтказилган. Сhina Plus порталининг маълум қилишича, Хитойнинг Чунцин шаҳридаги шифохонада 84 ёшли беморда 3D-босма қўлланган ҳолда дунёдаги илк операция ўтказилди.
Янги технология қўлланган операция артритдан азият чекувчи қариянинг тизза бўғимида ўтказилди. Статистикага кўра, 50 ёшдан 59 ёшгача бўлган одамлар орасида артрит билан касалланганлик 62 фоизга етади. Бугунги кунда касалликнинг кечки босқичларида ягона ечим шикастланган бўғимни тўлиқ алмаштириш ҳисобланади. Бироқ бу ҳар доим ҳам самара бермайди.
Профессор Янь Люнинг айтишича, тизза бўғимининг тўлиқ алмаштирилиши артритнинг кечки босқичларидаги энг самарали даволаш усули ҳисобланади, чунки у беморларнинг оғриқларини камайтириши ва турмушларини яхшилаши мумкин. Бироқ, операциядан кейинги инфекциялар ёки бошқа сабабларга кўра бўғим атрофидаги суякларда нуқсонлар вужудга келиши мумкин. Уларнинг шакли кучли фарқ қилади ва мавжуд усуллар билан бу нуқсонларни тўғрилашнинг имкони йўқ.
Шу сабабли асоратлардан қочиш учун, 84 ёшли беморнинг тиззасидаги нуқсон ноёб тантал метали билан тўлдирилган. Бу металл стоматологик ва жарроҳлик имплатантларида қўлланади. Танталнинг кўпроқ титан билан қотишмасидан фойдаланилади, чунки танталнинг ўзи юқори ҳароратларда эрийди. Бу чекловни енгиб ўтиш учун махсус ёстиқчалар шаклидаги ғоваксимон тантал яратилди. Бу тантал бемор учун индивидуал равишда, автоматлаштирилган лойиҳалаш ва юқори аниқликдаги 3D-босма ёрдамида яратилган ва босилган. Мутахассисларнинг таъкидлашларича, бундай операция анча осон ўтказилади, бемор эса операциядан кейинги куниёқ оёғини бемалол ҳаракатлантира олади.
