Флоридада курьерлар уч ғилдиракли электровелосипедларда ҳаракатлана бошладилар

Флорида штатининг Форт-Лодердейл курорт шаҳрида куръерлик хизматлари кўрсатувчи UPS компаниясининг электровелосипедлари пайдо бўлди. Бу электровелосипедлар атроф-муҳитга зарар етказмаган ҳолда почта жўнатмаларини етказиш учун мўлжалланган.

Янги соф транспорт йўл ҳаракати хавфсизлигини ошириш ва юк транспорти миқдорини камайтиришга қаратилган Green Your Routine ва Vision Zero Fort Lauderdale дастурларини амалга оширишнинг яна бир шакли бўлди.

“Бу хусусий ва жамоатчилик секторлари биргаликда келишиб ишлаши ва замонавий шаҳарлар эҳтиёжларига жавоб берувчи экологик соф ечимларни излашига яна бир мисолдир. Агар гап атроф-муҳитга таъсирни камайтириш ҳақида борса, бизда транспорт турлари кўп, жумладан юқори мобилликни таъминловчи ва атрофга зарарли чиқинди чиқармайдиган велосипедларимиз бор”, деб айтган UPS’нинг техник директори Скотт Филлиппи.

eBike электровелосипедларининг муваффақияти илк бор Гамбургда – компания шаҳар ичида товарларни етказишнинг янги усулини тақдим қилганда намойиш қилинган. Компания бу мақсадда шаҳарнинг марказий туманларида жўнатмалар сақланадиган омборларни жойлаштирган. Пиёда юрувчи ёки махсус яратилган уч ғилдиракли велосипедларда ҳаракатланувчи курьерлар бу омборлардан жўнатмаларни олишган. Бу эса транспорт тармоғига юкламани ва зарарли газлар чиқарилишини камайтиришга имкон берган. Дастур яхши натижалар бергач, у Германиянинг қолган шаҳарларида, сўнгра Бельгия, Италия, Франция, Ирландия ва АҚШда татбиқ қилинган. 

“UPS 109 йиллик тарихининг бошида велосипедларда хизмат кўрсатувчи курьерлик компанияси бўлган. Биз ҳаво ва қуруқликдаги транспортнинг кенг тармоғини ривожлантирганимиз билан, велосипедлар шаҳарларнинг гавжум туманларида ҳаракатланиш усули сифатида яна қайтмоқда”, деб айтганди шундай дастурнинг Питтсбургда жорий қилиниши вақтида UPS вице-президенти Марк Уоллес.