Венесуэлада йил бошидан 1300 фоизлик инфляция қайд қилинди

Венесуэла мухолиф миллий ассамблеясининг молия бўйича комиссияси 8 декабрда 2017 йилнинг 11 ойи натижаларига кўра мамлакатдаги инфляция 1300 фоиздан ошганини, йил бўйича эса 2000-2100 фоизга етишини маълум қилди. 

Комиссия аъзоси Анхель Альварадонинг айтишича, бундай вазият ҳукуматнинг иқтисодий сиёсатидаги таназзул билан боғланган. “Венесуэла 15 чоракдан бери иқтисодий пасайиш ҳолатида бўлиб, бу депрессия ҳосил қилади”, деб айтган Альварадо.

Унинг прогнозига кўра, йил якунига кўра бир АҚШ доллари мамлакат қора бозорида 150 минг боливарга етади. Ҳозир бу кўрсаткич 95,5 минг боливарни ташкил қилмоқда.