Қозоғистондан қочиб кетган амалдорлар ва олигархлар қаерда яширинмоқда?

Қозоғистон Республикаси Молия вазирлигининг Давлат даромадлари қўмитаси иқтисодий суриштирувлар хизмати ходимлари Қозоғистоннинг хорижда терговдан яшириниб юрган 22 фуқаросини топишди, деб хабар бермоқда маҳкама матбуот хизмати.

"2017 йилда Молия вазирлигининг Давлат даромадлари қўмитаси иқтисодий суриштирувлар хизмати МДҲ ва хорижий давлатлар ҳудудларида – Россия, Қирғизистон, Озарбойжон, Украина, Мўғулистон, БАА ҳамда АҚШда иқтисодий фаолият соҳасида амалга оширилган жиноий ҳуқуқбузарликларни амалга оширгани учун терговдан яшириниб юрган, қидирувдаги 22 шахсни аниқлади", - дейилади хабарда.

Қозоғистон Бош прокуратураси томонидан бугунги кунда кўрсатилган шахсларни Қозоғистонга, жиноий жавобгарликка тортиш учун экстрадиция қилиш бўйича ишлар олиб борилмоқда.

"Ушбу шахсларнинг содир этган жиноятлари орасида асосий улушни ёлғон тадбиркорлик, солиқларни тўлашдан бўйин товлаш, фирибгарлик, ўзганинг мулкини ўзлаштириш ёки талон-торож этиш, иқтисодий контрабанда, ноқонуний тадбиркорлик ва банк фаолияти эгаллайди", - дейилади хабарда.