Саудия Арабистонининг Афинадаги элчихонасига ҳужум қилинди

Афинада “Рубикон” гуруҳи анархиячилари Яманнинг бомбардимон қилинишига норозилик сифатида 14 декабрь эрта тонгда Саудия Арабистонининг Грециядаги элчихонасига ҳужум қилишди. Улар қўриқчилар ўтирадиган будкани бузиб, элчихона ҳудудига нарсалар улоқтиришган. 

Ҳужум видеоси ва гуруҳнинг баёноти анархиячи ташкилотлар порталларида жойлаштирилган.

Таъкидланишича, видеодан ҳужумда воқеа жойига мотоциклларда келган ва шлемларда бўлган, камида 6 киши иштирок этганини кўриш мумкин бўлган.

“Рубикон” баёнотида айтилишича, гуруҳ Саудия Арабистони қироллик оиласи ўрнатган феодал қонунлар ҳамда унинг бу қонунларни бутун Яқин Шарққа ва қолган давлатларга ёйиш истагига қарши норозилик билдирган.

Баёнотда айтилишича, ИШИД ҳозирда амалга ошираётган қабиҳликлар Саудия Арабистонида ўнлаб йиллардан бери, бутун дунё кўз ўнгида юз бермоқда. Анархиячиларнинг таъкидлашича, Саудия Арабистонида қуллик 1962 йилдагина бекор қилинган ва у фақатгина қоғозда йўқ қилинган. Амалда эса иқтисодий муҳожирлар ҳақиқий қуллик шароитларида яшамоқдалар.

“Саудия Арабистони нефтдан олинган доллар билан бутун дунёнинг сабрини сотиб олмоқда”, дейилган баёнотда. Анархиячилар Греция ҳукуматининг Саудия Арабистонига ўқ-дорилар сотиш режаларини танқид қилишган.

Баёнотда таъкидланишича, Саудия Арабистони “Яманда номаълум уруш олиб бормоқда”, у ерда “ўн минглаб одамлар учун ҳақиқий жаҳаннамни” яратган. “Яманда оммавий қирғин мавжуд. Ғарб ОАВ бу ҳақда имкони борича сукут сақлайди”, дейилган баёнотда.

Жорий йилда “Рубикон” гуруҳи турли муассасалар ва биноларга ўнлаб маротаба бостириб кирган. 17 ноябрда анархиячилар Греция мудофаа вазирлиги ҳудудига кириб, бош штаб биносига киришмоқчи бўлишган, октябрда эса Испаниянинг Афинадаги элчихонасига бостириб киришган.   

Грециянинг сиёсий партиялари етакчилари бундай ҳолатларга йўл қўйиб бўлмаслигини айтишган ва анархиячиларни тўхтатиш учун чоралар кўришни талаб қилишган.