«Атлетико»нинг франциялик ҳужумчиси Антуан Гризманн твиттерга қўйган сурат муҳокамаларга сабаб бўлди.
Гризманн «Гарлем Глобтроттерс» (Америкадаги баскетбол шоу-жамоаси) баскетболчисига ўхшаш қиёфадаги суратини намойиш этганди. У парик тақиб, танасини қора рангга бўяганди ва «80-йиллар услуби», дея изоҳ қолдирганди.
Шу заҳоти футболчига танқид ёғдира бошлашган. Унинг либосини ирқчилик белгиси сифатида қабул қилишган. Кўплар ундан терма жамоа йиғинига келганида қора танли жамоадошларига қандай изоҳ беришига қизиқишган.
Футболчи вазиятни юмшатишга ҳаракат қилган ва қуйидагича твит қолдирган: «Тинчланинг, дўстлар. Мен «Гарлем Глобтроттерс» фанатиман, бу уларнинг ажойиб даври нафаси. Бу оммаж».
Уни бу твитидан кейин янада кўпроқ танқид қилиб, сўка бошлашди. Якунда Гризманн твитларини ўчириб, узр сўрашига тўғри келди.
«Мен хато қилганимни тан оламан. Мен кимнидир ранжитган бўлсам, узр сўрайман», – дея ёзган француз футболчиси.
Блэкфейс - оқ танли одамлар қора танли қиёфасига кириш учун грим ишлатиши бўлиб, уни XIX асрнинг иккинчи ярмида қўллай бошлашган. Оқ танли артистлар театрларда қора танли кишини (қуллар ёки озод кишилар) шундай грим орқали ифодалашган. Ўша вақтларда томошабинлар уларни гримсиз ҳолатда кўришни исташмасди.
Бугунги кунда блэкфейс қора танлиларга ҳурматсизликнинг юқори кўринишларидан бири ҳисобланади.
