«Тажовузкор». Путин АҚШнинг янги стратегиясига изоҳ берди

Россия Федерацияси президенти Владимир Путиннинг маълум қилишича, АҚШнинг миллий хавфсизлик бўйича янги стратегияси тажовузкор характерга эга.

РФ раҳбари буни эътиборга олишга чақирган. Шунингдек, унинг маълум қилишича, АҚШ ўрта ва яқин масофаларга мўлжалланган ракеталарни йўқ қилиш бўйича шартномани бузмоқда. Унинг сўзларига кўра, Вашингтон Москва томонидан гўёки бузилишларни қидириб, шартноманинг таназзулга юз тутишига олиб келмоқда.

"Америка Қўшма Штатларида ракеталарга қарши мудофаа тизимини синовдан ўтказиш учун фойдаланилаётган ракета-нишонлар ўз хусусиятларига кўра, ўрта ҳамда яқин масофаларга мўлжалланган баллистик ракеталарга ўхшашдир. Улар бор ва қўлланилмоқда. АҚШда уларнинг ишлаб чиқарилиши ўрта ва яқин масофалардаги ракеталарни йўқ қилиш бўйича шартнома билан тақиқланган технологиялар ишланмасидан дарак беради", - дея маълум қилган Путин Россия Мудофаа вазирлиги коллегиясининг кенгайтирилган йиғилишида.

Унинг ишонч билдиришича, "АҚШ ишни ўрта ва яқин масофаларга мўлжалланган ракеталарни йўқ қилиш бўйича шартномани бузишга қараб олиб бормоқда". "Ҳар доим бизнинг томондан қандайдир бузилишларни излашмоқда, ўзлари эса шу билан шуғулланишмоқда", - дея таъкидлаб ўтган Путин.

У жаҳонда, айниқса, РФ чегараларида, можароли минтақаларда, Европада кучлар мувозанатининг ўзгаришини Америка ракеталарга қарши мудофаа тизими ҳисобга олинган ҳолда диққат билан кузатиб боришни талаб қилган. Путиннинг айтишича, Россияда ҳарбий инфратузилманинг тажовузкор ривожланишидан пайдо бўлувчи таҳдидларга мос жавоб қайтаришга суверен ҳуқуқи бор.