АҚШ Суриянинг ҳудудий яхлитлигига қарши режа тузмоқда – Руҳоний

Эрон президенти Ҳасан Руҳоний АҚШ Сурия ва бутун Яқин Шарқ минтақасининг ҳудудий яхлитлиги ва хавфсизлигига қарши режа тузмоқда, деб айтди. Бу ҳақда Руҳонийнинг сайтида айтилган. 

Эронда Ислом ҳамкорлик ташкилоти Парламент иттифоқининг 13-сессияси ўтмоқда. Унда турли давлатлар қонунчилик органлари вакиллари иштирок этмоқдалар. Руҳоний 16 январда Сурия парламенти спикери Ҳаммуд ас-Сабоҳ билан учрашган.

“АҚШ кўзлаётган режа халқаро меъёрларни бузади ҳамда Сурия ва бутун минтақанинг ҳудудий яхлитлиги ва хавфсизлигига қаратилган маккорона режадан иборат”, деб айтган Руҳоний учрашувда ва АҚШнинг Суриядаги мавжудлигини қоралаган.

Аввалроқ ОАВ маълум қилгандек, ИШИДга қарши курашувчи АҚШ бошчилигидаги коалиция Сурияда ўз назоратида бўлган ҳудудларни қўриқлаш учун “чегара хавфсизлиги кучларини” тайёрламоқда. Таъкидланишича, ушбу кучларнинг миқдори 30 минг кишигача етказилади. Коалиция бу мақсадда Сурия демократик кучлари билан биргаликда ишлаётгани маълум қилинган. Айни вақтда 230га яқин одам тайёргарликдан ўтмоқда.