Туркия нашри: АҚШ Сурия чегарасига террорчиларни жойлаштирди

Фото: Анадолу

Америка разведка хизматлари фаолияти ортидан Сурия ва Туркия чегарасидаги Таль-Абьяд туманига PYD/PKK гуруҳининг минглаб жангарилари жойлаштирилган. Бу ҳақда Туркиянинг «Анадолу» агентлиги Сурия шимолидаги ишончли манбасига асосланиб хабар тарқатди.

Америка армиясининг зирҳли машиналари конвойи ўтган ҳафтада икки марта Таль-Абьядга келган. Бу ҳудуд Сурия демократик кучлари (PYD/PKK) тасарруфида ҳисобланади.

Хабарда айтилишича, америкалик ҳарбийлар ўнлаб автомобилларда келиб Таль-Абьяд тумани ғарбида разведка ишлари олиб борган.

Шундан сўнг кўп вақт ўтмасдан, Сурия шимолидаги ушбу ҳудудга PYD/PKK жангчилари кўча бошлаган, бу жангчилар шу вақтгача Айн-аль-Араб (Кобани) шаҳридан жанубдаги Айн-Исса посёлкасида эди.

Жангчилар кўчиб келган ҳудудга 10та кузатув пости ўрнатилган.

Аввалига бу постларда кўпи билан 15 нафардан жангчи бўлган, эндиликда уларнинг ҳар бирида 100 нафар жангчи жойлаштирилган.

#Туркия #Сурия