Сирдарёдаги йўллар қачон тартибга келтирилади?

KUN.UZ таҳририяти Сирдарё вилоятига ташриф буюриб, вилоят ҳокими Ғофур Мирзаев билан очиқ мулоқот ўтказди. Суҳбат давомида вилоятдаги йўллар ҳолати, бу борадаги ишлар ҳақида маълумот берилди.

«Сирдарё вилоятида 3813 километр ички автомобиль йўллари мавжуд бўлиб, шундан шаҳар кўчалари 312 километр, туман марказий кўчалари 147 километр, хўжаликлараро автомобиль йўллари 1622 километр, қишлоқ аҳоли пункти кўчалари 1416 километр, шаҳар типидаги кичик посёлкаларда 314 километрдир. Вилоят автомобиль йўлларини таъмирлаш, сақлаш бўйича битта кичик ташкилот бўлган. Келганимиздан кейин бу ташкилотни тубдан такомиллаштириш, алоҳида ривожлантириш, модернизация қилиш бўйича алоҳида дастур қабул қилдик. Бу ерни ўзимизда, чет элда ишлаб чиқариладиган техника билан таъминладик. Суткасига 50 тоннага яқин асфальт ишлаб чиқарадиган кичик завод бор эди, ҳозир янги завод олиб келдик. 2017 йилда йўлнинг қурилишига 2016 йилга қараганда икки ярим баробар кўпроқ маблағ ажратилди.

Бироқ бугунги кунда ички хўжалик йўлларининг 3160 километр қисми ёки 83 фоизи таъмирталаб аҳволда. 2018 йилда 136 километр йўлни таъмирлаш белгиланган. Кўприкларимиз жуда ёмон аҳволда бўлган, ҳозир ҳар бирини таъминлаш чораларини кўряпмиз. Бунга ҳам катта маблағ сарфланади, бироқ қилиш керак. Йўллар ландшафтини ҳам тартибга келтирмоқдамиз, биринчи қаторига арча, сўнг қайрағоч, учинчисига акация каби ўзимизнинг дарахтларни экиб, олти қаторли кўринишга келтирилади. Бу Чиноздан бошланиб, то Даштободгача қилинади», - деди ҳоким.