Aston Martin Valkyrie гиперкари Ой чанги қўшилган бўёқ билан бўялади

Aston Martin Valkyrie гиперкари баъзи ракурслардан коинот кемасига ўхшаб кетади. Айнан шу жиҳат мижозлардан бирини ноодатий ғояга етаклади. 

Чекланган миқдорда чиқариладиган Aston Martin Valkyrie гиперкарининг базавий комплектацияси 2,6 млн доллар туриши ҳар бир мижознинг унинг “инжиқликлари”га мос ўзига хос машина олишини англатади. Бундай катта пулга ким ҳам “базавий вариант”га буюртма берарди? Бироқ бир буюртмачининг “инжиқлиги” қолганларникидан “ўтиб тушди”: у ўз машинасини ҳақиқий Ой жинси қўшилган бўёқ билан бўятишга қарор қилди. Бунинг учун миллионер Ойдан келтирилган тошни сотиб олди: ушбу жинс кукун ҳолатигача майдаланиб, бўёқ билан аралаштирилади. Бундай “коинот қопламаси” автомобилсозлик саноатида илк бор қўлланмоқда.

Инстаграмда lamborghiniks ники остида қайд қилинган ушбу мижоз унинг “Валькирия”си Lunar Red рангида бўлишига қарор қилди. Ой жинси чанги машина рангини қанчалик ўзгартиришини олдиндан айтиш қийиндир. Таъкидланишича, бўёқда Ой чанги қўлланганини кўз билан хойнаҳой илғаб бўлмайди. 

Бу бўёқ эсклюзивлиги бўйича “Роллс-Ройс” учун қўлланган, минглаб майда олмослардан иборат Diamond Stardust рангини ҳам, “Ниссан”нинг ёруғланувчи бўёғини ҳам ортда қолдирадиган кўринади. 

Буюртмачининг фикрича, Valkyrie коинот кемасига ўхшаган автомобиль эмас, балки автомобилни эслатиб юборувчи коинот кемасидир. Охирги маълумотларга кўра, машинанинг гибрид куч қурилмаси умумий қуввати 1146 от кучини, машина вазни эса ҳайдовчи, бензин билан бирга 1030 кг ни ташкил қилади. 1,8 тонналик босувчи куч машинага ҳалқали трассаларни “Формула-1” болидлари каби ўтишни таъминлайди. Компания машинанинг оддий йўлларга мўлжалланган версиясидан 150 дона чиқаришидан ташқари, пойга трекларига мўлжалланган Valkyrie AMR Pro вариантидан 25 дона чиқаради. Айтиш жоизки, машинанинг у варианти ҳам, бу варианти ҳам аллақачон ўз эгаларини топиб бўлган.