Huawei смартфонлари суратлар олиш учун энг яхши деб топилди

Mobile Photography Awards ташкилоти мутахассислари смартфонлар ёрдамида олинган энг яхши суратларнинг 2017 йилги танловига якун ясашди. Унга кўра, Huawei фотолар учун энг яхши смартфон номини Apple’дан тортиб олди.

Ташкилот ходимлари Лондонда яшовчи хитойлик Нан Дэн томондан олинган суратларнинг сифатини юқори баҳолашган. Унинг Huawei Mate 9 ва Huawei P10 смартфонларида олинган суратларнинг юқори сифати мутахассисларнинг ҳайратига сабаб бўлган. Улар смартфонда қандай қилиб бундай ажойиб сифатдаги суратларни олиш мумкинлигидан ҳайратланишган. Apple қурилмаларида олинган суратлар ҳам юқори баҳоланган, бироқ 2-ўринга лойиқ деб топилган.

Таъкидлаш жоизки, мутахассислар Хитой смартфонлари баъзи жиҳатлари бўйича борган сари Apple қурилмаларидан устунликка эришаётганини тан олишмоқда. Аввалроқ OnePlus компаниясининг янги гаджетида пайдо бўладиган юзни таниш функцияси таърифга кўра Apple’никида яхшироқ ишлаши ҳақида маълум қилинганди.