Tesla Европада Mercedes ва BMW’ни ортда қолдирди

Tesla Model S электр седани Европадаги савдо ҳажми бўйича Германиянинг Mercedes-Benz, BMW ва Audi компанияларининг люкс тоифадаги седанларини ортда қолдирди. Бу ҳақда Automotive News Europe хабар бермоқда.        

Model S АҚШда бир неча йиллардан бери немис брендларидан харидоргирроқ бўлиб, бироқ немис компаниялари ватанида илк бор рақобатчиларини ортда қолдира олди. 

JATO Dynamics маълумотларига кўра, 2017 йилда Model S’нинг Европадаги савдо ҳажми 30 фоизга ошиб, 16132 донани ташкил қилган. Бу орада Mercedes S-синф савдоси 3 фоизгагина ошиб, 13359 донани, BMW савдоси эса, аксинча, 13 фоизга тушиб кетиб, 11735 донани ташкил қилган. 

“Европа автокомпанияларига моделлар қаторини “электрлаштириш”ни жадаллаштириш лозим, чунки харидорларда улар бу пойгада ортда қолаётгандек таассурот пайдо бўлмоқда”, деб айтган JATO таҳлилчиси Фелипе Муньоса.

Яқин орада премиал сегментда яна бир нечта янги электр моделлар – Jaguar I-Pace, Audi e-tron Quattro, Porsche Mission E ва Tesla Model S’нинг бевосита рақобатчиси Volkswagen Vizzion савдоси бошланиши керак.