БМТнинг Сурияда ўт очишни тўхтатиш ҳақидаги резолюциясига амал қилинмаяпти

Туркия президенти Ражаб Тойиб Эрдўған БМТ Хавфсизлик кенгашининг Сурияда ўт очишни тўхтатиш ҳақидаги резолюциясига амал қилинмаётгани ҳақида маълум қилди. У Туркия бу борада Россия ҳамда Эрон билан музокара ўтказишини қўшимча қилган.

«БМТ Хавфсизлик кенгаши қарор чиқарди, аммо икки кундирки, унга амал қилинмаяпти ва шафқатсизларча ўт очиш давом этмоқда. Биз бир неча ойлардан буён Шарқий Ғутадан қариялар ва болаларни эвакуация қилиш учун ҳаракат қилмоқдамиз, аммо бизни ҳеч ким эшитмаяпти. Бугун Франция президенти Эммануэль Макрон билан телефон орқали гаплашдим, биз бу масаланинг барча жиҳатларини муҳокама қилдик. Мен у ҳам вазиятдан ташвишда эканига гувоҳ бўлдим. Биз тинчликка эришиш учун ҳаракатларни давом эттирамиз. Россия ва Эрон президентлари билан бу борада музокараларни давом эттирамиз», деган Эрдўған журналистлар билан учрашувда.

БМТ Хавфсизлик кенгаши 24 февраль куни Сурияда 30 кунлик режимда ўт очишни тўхтатиш ҳақидаги резолюция лойиҳаси бўйича овоз берди. Бу резолюция қуролли тўқнашувлар давом этаётган ҳудудлардан тинч аҳоли вакилларини ҳамда ярадорлани олиб чиқиш, уларга зарур ёрдамларни кўрсатишни назарда тутади.

Резолюция қабул қилингандан 72 соат ўтиб кучга кириши лозим бўлган ярашув режими ИШИД террорчилик гуруҳига қарши ҳарбий операцияларга тааллуқли бўлмайди.

Ҳужжат матнига, шунингдек, можаронинг барча томонлари, жумладан, Сурия ҳукуматига халқаро гуманитар ҳуқуқ меъёрларига риоя этиш талаблари киритилган.