Словакияда биринчи марта журналист ўлдириб кетилди

Словакияда журналист-суриштирувчи Ян Кучак жасади топилди. Маълум қилинишича, журналист Велка Мача аҳоли пунктидаги уйида рафиқаси билан бирга отиб кетилган.

Қотиллик 22 ва 25 февраль кунлари оралиғида юз берган. Полиция 27 ёшли Кучак ва рафиқасининг жасадларини уларнинг яқинлари алоқага чиқмаётганларини маълум қилганларидан кейин аниқлаган.

Словакия президенти Андрей Киска қотилликни зудлик билан тергов қилишни талаб қилган. Бош вазир Роберт Фицо ушбу қотилликни мамлакатдаги сўз эркинлиги ва демократияга мисли кўрилмаган ҳужум деб атаган.

Кучак Словакия тарихида ўлдирилган биринчи журналист бўлди. У Aktuality.sk нашрида ишлаган ва солиқдан бўйин товлаш билан боғлиқ терговлар билан шуғулланган. Полициянинг тахминича, журналистнинг ўлдирилиши унинг касби билан боғланган.

Кучак 2017 йилда полицияга словакиялик тадбиркор томондан таҳдидларга учраётганидан шикоят қилган, кейинроқ эса полиция ҳеч қандай чора кўрмаганини маълум қилган.