Папуа – Янги Гвинеяда яна бир кучли зилзила, қурбонлар бор

Папуа – Янги Гвинеяда яна бир кучли зилзила юз берди, унинг магнитудаси 6,0ни ташкил этди, деб хабар бермоқда АҚШ Геология хизмати.

Ер ости силкинишлари Тошкент вақти билан соат 7:45да мамлакат марказий қисмидаги Тари шаҳридан 59 километр жануби-ғарбда қайд этилди. Ер қимирлаши ўчоғи 10 километрлик ер тубида жойлашгани айтилмоқда. Reuters агентлиги хабарига кўра, Тарида бир киши ҳалок бўлди, яна 5 киши яқин ерда жойлашган қишлоқнинг кўчки остида қолиши туфайли ҳаётдан кўз юмди.

Эслатиб ўтамиз, Папуа - Янги Гвинеяда 26 февраль соат 4 атрофида юз берган 7,5 магнитудали зилзила оқибатида 30 дан кўпроқ одам ҳалок бўлганди.