Трамп ва Ким Чен Иннинг учрашув жойи ҳамда санаси кейинроқ белгиланади 

АҚШ президенти Дональд Трампнинг КХДР етакчиси Ким Чен Ин билан учрашуви жойи ҳамда санаси кейинроқ белгиланади. Бу ҳақда Оқ уй матбуот котиби Сара Сандерс хабар берган.

"Президент Трамп Ким Чен Ин билан учрашиш ҳақидаги таклифни қабул қилди. Учрашув кейинроқ аниқланадиган жой ва санада бўлиб ўтади", - дея таъкидлаб ўтди у.

Сандерснинг сўзларига кўра, АҚШ “Корея ярим оролини ядро қуролидан холи ҳудудга айлантириш бўйича келишувга эришилишига умид қилмоқда”. "Шу билан бирга, барча санкциялар ўз кучида қолади ва биз бундан кейин ҳам Пхеньянга максимал босим ўтказамиз", - дея қўшимча қилиб ўтди у.

Аввалроқ Шимолий Корея етакчиси Ким Чен Ин АҚШ президенти Дональд Трампга учрашув ўтказиш таклифини йўллагани хабар берилганди. Трамп Ким Чен Иннинг май ойигача учрашиш таклифига розилик берган. Бу ҳақда Жанубий Корея президентининг миллий хавфсизлик бўйича маслаҳатчиси Чон Ий Ён Трамп билан музокаралардан кейин маълум қилган.