Туркия Россиядан С-400 нега харид қилинганини тушунтириб берди

Туркия ТИВ раҳбари Мавлуд Чавушўғлининг тушунтиришича, Анқара Россиядан С-400 зенит-ракета мажмуаларини уларга тезкор эҳтиёж бўлгани учун харид қилди. Бу ҳақда у Zeit газетасига берган интервьюсида айтиб ўтди, деб хабар беради РИА «Новости».

Аввалроқ АҚШ Туркияни у Россия зенит-ракета мажмуасини харид қилгани учун бир неча марта танқид қилганди. Қайд этилишича, ушбу мажмуалар НАТОнинг ракеталарга қарши мудофаа тизимларига интеграциялашмайди.

«Улар бизга жуда тез керак эди, сабаби бизда ракеталарга қарши мудофаа тизимлари бўлмаган. Бизда АҚШдан оддий қуролни сотиб олиш билан ҳам боғлиқ муаммо бор эди, сабаби конгрессда турли шубҳалар юзага келди. Биз кимдандир харид қилишимиз лозим эди. Агарда АҚШ ҳукумати конгресс бунга имкон бериши борасида кафолат тақдим этса, биз уларнинг Patriot ракеталарга қарши тизимларини харид қиламиз», - дея айтиб ўтди Чавушўғли.