«Ливерпуль» ҳужумчиси Муҳаммад Салоҳ «Уотфорд» дарвозасига покер қайд этиб, мавсумдаги голлари сонини 36тага етказганидан кейинги фикрларини билдириб ўтди.
«Мен барчага, айниқса жамоадошларимга миннатдорчилик билдиришим керак. Уларсиз мен шунча гол ура олмасдим.
Биз ҳар бир ўйинда 3 очко олиш учун ҳаракат қилишимиз керак ва мен ҳар бир ўйинда гол уриб, жамоамга ёрдам беришга ҳаракат қиламан. Бугун энг асосийси – 3 очко қўлга киритдик.
Биз ўтган тур ўйинидаги муваффақиятсизликдан кейин яхши қайта олдик. Жуда яхши натижага эришдик ва дарвозамиздан гол ҳам ўтказмадик. Мана шуниси энг муҳими», – деган Салоҳ.
Салоҳ айни вақтда АПЛдаги голлари сонини 28тага етказди ва Ҳарри Кейнни (24 гол) ортда қолдириб, тўпурарлар рўйхатида яққол пешқадамга айланди. У шунингдек, мавсумда кўп гол уриш бўйича (36 гол) Европа чемпионатларида энг яхши натижа кўрсатмоқда. Ундан кейин Кейн (35 гол), Месси (34), Иммобиле (34), Кавани (33) ва Роналду (33) жойлашган.
Салоҳ «Ливерпуль»нинг АПЛда покер қайд этган тўртинчи футболчиси бўлди (Фаулер, Оуэн ва Суаресдан кейин), у АПЛда покер қайд этган илк мисрлик футболчи, у 2009 йилдан буён АПЛда бир ўйинда 4та зарбада 4 гол урган илк футболчига айланди (Аршавиннинг рекорди такрорланди), «Мисрлик Месси» лақабини олган футболчи «Ливерпуль» тарихида илк мавсумда энг кўп гол урган футболчига айланиб, Торрес қайд этган рекордни (33) янгилади.
Мерсисайдликларнинг бир мавсумда энг кўп гол урган футболчиси ҳозирда Иэн Раш бўлиб турибди, у 1983-84 йилги мавсумда жами 47 гол урган, Салоҳ бу рекордни ҳам янгилаши учун яна 11 гол уриши талаб этилади.
