Анқара учрашувида муҳим келишувларга эришилди

Фото: Анадолу

Туркия, Россия ва Эрон Суриянинг ҳудудий яхлитлиги ва дахлсизлигига амал қилиш бўйича умумий фикрга келишди. Бу ҳақда Россия президенти Владимир Путин туркиялик ва эронлик ҳамкасблари Ражаб Тоййиб Эрдўған ва Ҳасан Руҳоний билан Анқарада ўтган учтомонлама учрашув якунида айтиб ўтди.

Россия президентининг сўзларига кўра, саммитда Суриядаги вазиятнинг асосий жиҳатлари муҳокама этилган ва бу мамлакатда тинчликка эришиш бўйича фикрлар алмашилган.

«Ҳамкасбларимиз билан муҳим келишувга эришдик. Бу келишув бизнинг қўшма баёнотимизда акс этган. Туркия, Россия ва Эрон Сурия суверенитети ва ҳудудий яхлитлигини ёқлаб чиқди», - деган Путин.

Унинг сўзларига кўра, айрим кучлар диний ва этник можароларни қўзғаб, Яқин Шарқдаги зиддиятлар ўчоғи сақлаб қолинишини истамоқда.

Путиннинг қайд этишича, Россия, Эрон ва Туркия Остонадаги музокараларда эришилган келишувларни амалга ошириш учун барча соҳалардаги ҳамкорликни янада кенгайтиришга келишиб олишган.

Россия президентининг таъкидлашича, гарант давлатлар (Россия, Туркия ва Эрон) амалга оширган саъй-ҳаракатлар эвазига Суриядаги зўравонлик бирмунча пасайди ва ИШИД эгаллаб олган ҳудудларнинг катта қисми озод этилди ва бошқа террорчи гуруҳларнинг позициялари кучсизлантирилди.