Россия ва Ўзбекистонда ҳамкорлик учун катта салоҳият мавжуд – Валентина Матвиенко      

Россия ва Ўзбекистонда ҳамкорлик учун ҳали амалга оширилмаган катта салоҳият мавжуд, икки давлат эндигина уни ўзлаштира бошладилар. Бундай фикрни Россия Федерация кенгаши спикери Валентина Матвиенко Ўзбекистон Олий Мажлиси Қонунчилик палатаси вице-спикери Борий Алиханов билан учрашувда айтиб ўтди.

“Ҳамкорлик салоҳияти ва имкониятлари улкан, биз уларни энди ўзлаштира бошладик”, деб айтган Матвиенко МДҲ Парламентлараро ассамблеяси давомида бўлиб ўтган учрашувда. Матвиенконинг таъкидлашича, икки томонлама муносабатларнинг яхшиланишида Ўзбекистон Президенти Шавкат Мирзиёевнинг Россияга ташрифи ва президент Владимир Путин билан учрашуви катта аҳамиятга эга бўлди. Жумладан, Матвиенко минтақалараро ҳамкорликка ҳам урғу беришни таклиф қилган.       

“Россия учун Ўзбекистон муҳим, вақт билан синалган стратегик шерик, ишончли иттифоқдош ҳисобланади. Биз охирги икки йил ичида ўзаро ҳамкорлигимиз янги ривожланиш, янги йўналиш олганидан хурсандмиз”, деб айтган Матвиенко. У Ўзбекистоннинг МДҲ Парламентлараро ассамблеясида иши яна тикланганидан мамнунлигини айтган.      

Ўз навбатида Борий Алиханов охирги йилларда Ўзбекистон ва Россия ўртасидаги ўзаро муносабатлар ижобий ривожланаётганини қайд қилиб ўтган. Алиханов иқтисодий ҳамкорликда ҳам ижобий динамика кузатилаётганини таъкидлаб ўтган ва икки давлат ўртасидаги ўзаро савдо айланмаси 2017 йил 2016 йилга нисбатан 33 фоизга ўсганини қўшимча қилган.

“Ўзбекистоннинг ташқи сиёсий йўналиши давлатларимиз ўртасидаги стратегик ҳамкорликни мустаҳкамлашга қаратилган”, деб айтган Алиханов.