Америкалик геологларнинг фикрича, АҚШнинг Ғарбий соҳилидаги Хейворд ёриғи Сан-Андреас ёриғи каби маълум бўлган, Тинч океани ва Шимолий Америка плиталари ўртасидаги узунлиги 1,3 минг км бўлган ёриқдан кўра кучли зилзилага сабаб бўлиши мумкин. Таъкидланишича, Хейворд ёриғи Сан-Пабло кўрфазининг жанубий қисмидан Фримонт шаҳригача чўзилган.
АҚШ геологик хизмати маърузасида айтилишича, агар Рихтер шкаласи бўйича кучи 7-8 баллга баҳоланаётган бундай зилзила юз берадиган бўлса, унинг биринчи дақиқалари камида 800 киши ҳалок бўлиши ва 18 минг киши жароҳат олиши мумкин.
Геофизик Кен Худнутнинг айтишича, электр тармоқлар ва бошқа коммуникациялар вайрон бўлиши оқибатида ёнғинлар бошланади. Улар 52 мингта уйнинг кулини кўкка совуради. Ёрилган қувурлар сабабли сувнинг бўлмаслиги ўт ўчирувчилар ишини қийинлаштириб, вазиятни янада оғирлаштириши мумкин.
HayWired сценарийси бўйича, вайрон бўлаётган бинолардан 2,5 минг киши жабрланиши, лифтлар эса 22 минг киши учун қопқонга айланиши мумкин. 400 минг киши ўз уйини тарк этади, ичимлик суви билан муаммолар 6 ой давом этади. 100 мингга яқин иншоот яроқсиз ҳолга келади, 390 мингтасига эса жиддий шикаст етади.
Геологлар ушбу кучли зилзила хавфини “белгиланган вақтда портлайдиган тектоник бомба” деб аташмоқда ва фавқулодда хизматларни унинг оқибатларини бартараф этишга тайёр туришдан огоҳлантиришмоқда.
Олимлар фалокат бир нечта йирик шаҳар, жумладан Лос-Анжелес, Пало-Альто, Окленд, Ричмонд ва Сан-Францискони қамраб олиши мумкинлигини айтишган.
