Французлар Трампнинг Париждаги терактлар ҳақидаги сўзларини “ҳақоратомуз” деб аташди

АҚШ президенти Дональд Трампнинг агар парижликлар қуролланган бўлганларида, 2015 йилдаги терактларни тўхтата олган бўлишлари мумкинлиги ҳақидаги гаплари французларнинг нафсониятига тегди. Бу ҳақда The Independent нашри хабар берди. Шу сабабли Франция ҳукумати Трампдан 13 ноябрдаги терактлар қурбонлари хотирасини ҳурмат қилишни талаб қилган.

Трамп ушбу сўзларини Далласда миллий ўқчилар уюшмаси аъзолари йиғилишида айтиб ўтган. 

“Агар у ерда (Парижда) бирор одам бўлса ҳам террорчига қарата йўналтирилган қуролга эга бўлганда, террорчилар қочиб кетган ёки ўлдирилган бўларди ва воқеа ўзгача тус оларди”, деб айтган Трамп.

Трампнинг бу сўзларига жавобан Париж мэри Анн Идальго Трампнинг терактларга берган таърифини “шармандали ва номуносиб” деб атаган. Франциянинг собиқ президенти Франсуа Олланд эса Трампнинг бу “шармандали изоҳлари” у Франция ҳақида ва унинг қадриятлари ҳақида қандай фикрда эканлигидан дарак беришини айтган.  

Франция иқтисодиёт вазири Бруно Ле Мэр Трампга терактлар ҳақидаги ўз сўзларини ортга қайтариб олиш чақириғи билан юзланган.

“Унинг сўзлари ҳақоратли ва халқаро майдондаги энг кучли ва Францияга дўст давлат президентига номуносибдир. Ахир биз АҚШда қуролнинг эркин тарқатилиши сабабли юз бераётган оммавий қотилликлар бўйича шундай сўзларни айтишни ўзимизга эп кўраяпмизми? Мен у ўз сўзларини ортга қайтариб олишини ва афсус билдиришини истайман”, деб айтган Ле Мэр.

Парижда 2015 йил 13 ноябрда содир этилган бир қатор терактлар оқибатида 130 киши ҳалок бўлганди.