Фото: Трамп Шимолий Кореядан озод қилинган маҳбусларни кутиб олди

АҚШ президенти Дональд Трамп ва вице-президент Майк Пенс КХДРда сиёсий маҳбусликдан озод этилиб, АҚШга қайтариб олиб келинган 3 нафар америкаликни кутиб олишга чиқди.

CNN телерепортажида Трамп ва Пенс рафиқалари Мелания ва Карен билан биргаликда асирликдан қайтган америкаликларни қаршилаш учун самолёт бортига чиқишганини кўриш мумкин.

АҚШ Давлат котиби Майкл Помпео ва озод этилган америкаликлар чиққан самолёт маҳаллий вақт билан соат 2:40да (Тошкент вақти билан соат 11:40) Мэриленд штатидаги Вашингтонга яқин Эндрюс авиабазасига қўнди.

Yonhap News агентлигининг ёзишича, КХДРда қамоққа олинган, жосуслик ва душманона ҳаракатларда айбланган АҚШ фуқаролари апрель ойида қамоқ лагеридан Пёнгянг яқинидаги меҳмонхоналардан бирига ўтказилган эди. Уларни озод этиш борасидаги музокаралар КХДРда АҚШ манфаатларини ифода этувчи Швеция воситачилигида ўтказилган.

Улардан бири Ким Дон Чель - 2015 йилнинг октябридан буён асирликда қолаётганди. У жосуслик фаолиятида айбланиб, 10 йиллик қамоққа ҳукм қилинганди. Яна икки маҳкум - Ким Сан Дук ва Ким Хак Сон - Пёнгянг университетида фан ва технологиядан дарс беришган. Улар бир ярим йил муқаддам «КНДРга нисбатан жинояткорона хатти-ҳаракатлар»да айбланиб қўлга олинганди.

Озод этилган америкаликлар Трампга ва Помпеога уйга қайтишда берган ёрдамлари учун миннатдорчилик билдиришди.

Ўтган йилда КНДР АҚШга америкалик 22 ёшли талаба Отто Вомбиерни топширганди. Бир йил давомида қамоқда бўлган талаба озод этилишидан бир ҳафта ўтиб вафот этганди. Қўшма Штатлардаги шифокорлар талабанинг бош миясида жуда оғир бузилишларни аниқлади.

У Шимолий Кореяга сайёҳ сифатида келган ва меҳмонхона деворидаги ташвиқот плакатини юлиб олиб, уйига эсдалик тариқасида олиб кетмоқчи бўлгани учун 15 йил муддатга озодликдан маҳрум этилганди.