Бугун Колумбияда президент сайловлари бўлиб ўтади

27 май куни Колумбия фуқаролари яқин 4 йилга янги президентни сайлашади.   

Мамлакат миллий сайлов кенгаши маълумотларга кўра, сайловларда 36,2 млн киши иштирок этиш ҳуқуқига эга. Айнан улар бу лавозимга даъвогарлик қилаётган 6 номзоддан бирини танлашади

Таҳлилчиларнинг фикрича, сайловларнинг 1-босқичида ғалаба учун зарур бўлган 50 фоиз + 1 та овозга ҳеч қайси бир номзод эриша олмаслиги эҳтимоли катта. Бу эса янги президентнинг номи 17 июнда 2-босқич бўлиб ўтгандан кейин маълум бўлишини англатади.

Президент лавозимига ўнг кучлар вакили Иван Дуке, пойтахт Боготанинг собиқ мэри Густаво Петро, Колумбия либерал партиясидан Умберто де ла Калье, “Колумбия” коалициясидан Серхио Фахардо, мамлакатнинг собиқ президент ўринбосари Херман Варгас Льерас ва собиқ сенатор, насроний пастор Антонио Трухильо даъвогарлик қилмоқда.

Сайловларда Колумбия инқилобий қуролланган кучлари номзоди Родриго Лондоньо Эчеверри ҳам иштирок этмоқчи бўлган, бироқ инфарктга учрагандан кейин сайловлардан ўз номзодини олган.