Путин ва Трамп яккама-якка учрашув ўтказади

АҚШ президенти Дональд Трамп 16 июлда Хельсинкида Россия президенти Владимир Путин билан яккама-якка учрашув ўтказади. Сўнгра кенгайтирилган таркибдаги учрашув ва амалий ланч бўлиб ўтади. Бу ҳақда АҚШнинг Россиядаги элчиси Жон Хантсман журналистларга маълум қилди. 

Хантсманнинг айтишича, Трамп Хельсинкига 15 июлда келади ва кечки пайт АҚШ элчихонаси ходимлари билан учрашув ўтказади. 16 июль эрталаб Трамп Финляндия президенти билан икки томонлама учрашув ўтказади.

Шундан кейин Трамп 16 июль кечки пайт АҚШга қайтиб кетади.

Хантсманнинг таъкидлашича, Трамп Путин билан учрашув кескинликни камайтиришга ва сермазмун ҳамкорликка олиб келишига умид билдирмоқда.

“Агар сиз муаммолар ҳақида гаплашмасангиз, унинг ечимларини топа олмаймиз. Президентнинг фикрича, Россия билан яхши муносабатлар Америка учун ҳам, Россия учун ҳам яхши бўлади, бироқ тўп Россия томонда. Президент Россияни ёмон ниятдаги ҳаракатлари учун жавобгарликка жалб қилишни давом эттиради”, деб айтган АҚШ элчиси.

Элчининг айтишича, Трамп мақсад қилган устувор вазифалар “Америка халқи ва манфаатлари ҳамда иттифоқдошлар ва ҳамкорлар манфаатларини ҳимоя қилиш”дан иборат. 

Хельсинкидаги учрашув икки етакчининг саммитлардан ташқари илк тўлиқ форматли учрашуви бўлади. Путин ва Трамп биринчи марта бир йил аввал G20 саммити доирасида, кейинроқ 2017 йил ноябрда Вьетнамда ОТИҲ саммитида учрашишган.