iPhone 7 икки кун сув остида қолиб кетгандан кейин ҳам ишлади

Ишлаб чиқарувчилар cувнинг 1 метр чуқурлигида  iPhone 7 смартфони 30 дақиқа ишлашига кафолат беришади. Лекин бир воқеа сабаб қурилма 48 соат давомида сувда қолиб кетган бўлсаям унинг функциясига ҳеч қандай зарар етмади.

Бир куни Дорсет (Англия) қирғоғига яқин ҳудудда сузиб юрган ғаввос Кериз Ҳирзи 30 фут чуқурликдан милтиллаётган нурга кўзи тушди. У яқинроқ борганида, iPhone7  русумли смартфонга смс-хабар келгани устидан чиқди. Қурилма шикастланмаган ҳам, сигнални ҳам қабул қилишда давом этган. Шунингдек, унинг 84 фоиз қуввати сақланиб қолган.

Digital Trends нашри хабар беришича, телефонни қайиқда сузиб юрган икки йигит ташлаб юборган. 48 соат ўтгандаям ишлашда давом этишига сабаб унинг ҳимоя қобиғи бўлган. Ғаввос сувдан чиққач iPhone 7’нинг эгаси рақамига қўнғироқ қилди. Маълум бўлишича, Канада фуқаросига тегишли қурилма Англияга қариндошиникига келган пайтда денгизга тушиб кетган.