Трамп мадҳияга ҳурматсизлик қилган спортчиларни жазолашга чақирди

АҚШ президенти Дональд Трамп давлат рамзларига ҳурматсизлик қилган Миллий футбол лигаси (МФЛ, америкача футбол) спортчиларини жазолашга чақирди.

Бу ҳақда у ўз Twitter саҳифасида ёзди.

«МФЛ ўйинлари пайтидаги миллий мадҳия бўйича баҳслар давом этмоқда, бунга ишониш қийин! Наҳотки регламентда ўйинчилар қўлларини кўксига қўйиб, тик туришлари ёзилмаган бўлса? Лиганинг 40 миллион доллар маош оладиган  комиссионери баёнот бериши лозим: илк қоидабузарлик учун — 1 ўйинга дисквалификация қилиш, иккинчиси учун — 1 мавсумга дисквалификация ёки маошидан маҳрум қилиш!», — деб ёзди Трамп ижтимоий тармоқда.

Гап миллий мадҳия ижро қилинаётган пайтда намойиш этилаётган норозилик акцияси ҳақида кетмоқда. Ўйинчилар бир тиззасига таянган ҳолда туриб, Американинг қоратанли аҳолиси муаммоларига эътибор қаратишларини талаб қилишмоқда.

Айниқса, Америка етакчиси томонидан бундай тадбирни давлат рамзларига ҳурматсизлик деб баҳоланишидан сўнг, намойишкорона акция миқдори ошиб кетган. 

«Бир тиззага таяниб туриш масаласининг ирқий муаммога алоқаси йўқ. Гап мамлакатга, унинг байроғи ва мадҳиясига ҳурматсизлик ҳақида кетмоқда», — деб ёзган эди Трамп бир йил олдин.

Май ойида МФЛ ўйинчиларга бир тиззага таяниб туришни тақиқлаган эди. Аммо, ўйинчилар касаба уюшмаси бу қарорни маъқулламади.