Олмаотада гепатит билан касалланган деярли 13 минг беморлар аниқланган

Ўтган йилдаги ҳолатлар сарҳисоб қилиниб, Олмаота шаҳрида 12 минг 747 нафар кишида гепатит аниқлангани маълум қилинди. Бу ҳақда «Казинформ» ахборот агентлиги хабар бермоқда. 

Маълум қилинишича, касалликка чалинганларнинг кўпчилигини катта ёшдаги кишилар ташкил этади. Шунга қарамай, 237та ҳолатда гепатит касаллиги болалар ва ўсмирлар ўртасида ҳам аниқланган. 

 «Гепатит билан касалланиш ҳолати Олматота шаҳрида мамлакат бўйича энг юқори даражада қайд этилмоқда. Шунинг учун, аҳоли орасида тиббий саводхонликни ошириш, тарғиботни кучайтириш лозим, деб ўйлаймиз», дейди Ижтимоий-тиббий суғурта жамғармаси Олмаота шаҳар филиали директори Тлеухан Абилдаев. 

Таъкидланишича, 2017 йил давомида Қозоғистон бўйича 70 мингга яқин кишида гепатит касаллиги мавжудлиги аён бўлган, улардан 5 минг 147 нафарида касаллик илк марта аниқланган.  

Бутун дунё бўйича гепатитнинг Б вируси билан 250 миллион киши касалланган, гепатит С билан эса 71 миллионга яқин киши курашади. Гепатит билан ўлим топаётган кишиларнинг 96 фоизи  айнан шу икки вирус тоифаси билан курашгани маълум.​