Трамп Жаҳон савдо ташкилотини яна бир бор «умумий фалокат» деб атади

АҚШ президенти Дональд Трамп Огайо штатида тарафдорлари олдида қилган чиқиши вақтида Жаҳон савдо ташкилотини яна бир бор "умумий фалокат" деб атади ва ўзидан аввалги президентларни танқид қилди. 

"Хитой ЖСТга қўшилганидан буён биргина Огайо саноат соҳасида 200 мингдан ортиқ иш ўрнини йўқотди. ЖСТ – бу умумий фалокат", -деди АҚШ раҳбари.

Трамп иқтисодий соҳадаги ҳаракатлари учун америкалик сиёсатчиларни яна танқид қилди.

"Ўнлаб йиллар давомида сиёсатчиларимиз бошқа мамлакатларга бизнинг иш ўринларимизни тортиб олишга, барча бойликларимиз ва иқтисодиётимизни талон-тарож қилишга йўл қўйиб беришган. Улар буни билиб туриб қилишган деб ўйламайман. Улар шунчаки нима билан шуғулланишаётганини ўзлари билишмаган ва тушунишмаган", - деди у.

Трамп ЖСТни аввал ҳам бир неча бор танқид қилганди. Апрелда у Twitter’да ЖСТ Хитойга имтиёз бериб АҚШга нисбатан адолатсизлик қилаётганини ёзганди. Июнь ойи бошида эса Шимолий Америка эркин савдо ҳудуди тўғрисидаги келишув ва ЖСТни "фалокат" деб атаганди. Трамп Вашингтон бу ташкилотнинг ислоҳ қилинишига эришишини билдирганди.

Жаҳон савдо ташкилоти 1995 йил 1 январда тузилган бўлиб, унга 160дан ортиқ давлат аъзо.