Боливияда президентнинг бриллиант қадалган олтин медалини ўғирлаб кетишди

Боливияда президент Эво Моралеснинг олтин медали ўғирланди, ўғирликни содир этганлардан бири қўлга олинди, деб хабар берди Los Tiempos газетаси.

Президентнинг бриллиант қадалган олтин медали ва тасмаси қўриқлаш хизмати ходими томонидан шаҳарнинг жиноятчилик юқори бўлган туманида автомобиль ичида унутиб қолдирилган. Жиноятчилар машина ойнасини синдириб, унинг ичидаги барча нарсани ўғирлаб кетишган, аммо буюмлар кимга тегишли эканини тушунишганидан сўнг маҳаллий телеканалга қўнғироқ қилишиб, ўғирланган нарсаларни Ла-Пасдаги черков яқинида қолдиришганини хабар қилишган.

Полиция буюмлар топилганидан кейин ҳам қидирувни тўхтатмаган. Жиноятчилар Перу фуқаролари бўлиб чиқишган. Улардан бири қўлга олинган. Эътиборсиз қўриқлаш хизмати ходими ҳам ҳибсга олинган.