Авиакомпаниялар бадавлат мижозларнинг инжиқликлари ҳақида сўзлаб беришди

Хусусий авиакомпаниялар бадавлат мижозлардан олган “телбанамо” талаблар ҳақида сўзлаб беришди. Бу ҳақда Daily Mail нашри хабар бермоқда. 

Мисол учун, бир мижоз от, бошқаси эса бошқа жойга кўчиб ўтиш учун иккита самолёт учун ҳақ тўлаган. Европадан Америкага йўл олган яна бир мижоз эса унинг ити тоза ҳавода сайр қила олиши учун парвоз вақтида қўшимча тўхташ амалга оширилишини сўраган. 

Яна бир йўловчи гурманлар учун бутербродлар ва янги мева-сабзавотлар буюртирган. Бу буюртмада ҳаммаси рисоладагидек туюлиши мумкин, аммо егуликлар тўтиқуш учун мўлжалланган бўлган.

Яна бир мижоз 4 та самолётни ижарага олиб, оиласи билан Флоридадаги Disney World кўнгилочар боғига йўл олган. Барча самолётлар Дисней эртакларига монанд безалган бўлган. 

Шунингдек, самолёт ойнасидан чиройли манзаралар кўриш иштиёқида бўлган мижозлар учун парвоз йўналишини ўзгартиришга ҳам тўғри келган.

50 ёшини самолётда торт ва шамчалар билан нишонлаш истагида бўлган бир мижоз учун самолёт бортига ўт ўчирувчи олишга тўғри келган, чунки бундай мутахассиссиз бортда очиқ аланга қўллаш мумкин эмас.

Шунингдек, ит, тўтиқуш, вино ва ҳаттоки уйда қолдирилган уяли телефон учун самолёт буюртириш ҳолатлари ҳам учраб туради. Яна бир мижоз эса унга Нью-Йоркдан Чикагога таом етказиб бериш учун самолёт буюртирган.

Бир жуфтлик эса самолётни 6 соатга банд қилган. Самолёт бортида вино, спа-муолажалар бўлган, таниқли опера қўшиқчиси эса жуфтликка қўшиқлар ижро этиб берган. Самолёт бундай “жўшқин” парвоздан кейин ҳавога кўтарилган шаҳрига қайтган.