Эфиопияда ҳарбий вертолёт қулаши оқибатида 18 киши ҳалок бўлди

Эфиопиянинг Оромия регионида ҳарбий вертолёт ҳалокатга учради. Бу ҳақда Reuters ахборот агентлиги хабар берди. 

Маълум қилинишича, вертолёт қулаши оқибатида 18 киши ҳалок бўлган. Улардан 15 нафари ҳарбий, 3 нафари оддий фуқаро бўлган. WRAL.com порталининг хабар беришича, барча ҳалок бўлганлар вертолёт бортида бўлган. Таъкидланишича, қурбонлар орасида 2 бола бор. 

Полиция вакилининг маълум қилишича, вертолёт мамлакат шарқидаги Дире-Дауа шаҳридан ҳавога кўтарилиб, 30 август эрталаб қулаган. У пойтахт Аддис-Абебедан жанубдаги Дэбрэ-Зэйт аҳоли пунктидаги ҳарбий-ҳаво кучлари базасига йўналаётган бўлган. Ҳалокатга нима сабаб бўлгани аниқлаштирилмоқда.