Навальнийнинг роликлари рекламаси туфайли Google сайловларга аралашмаслик ҳақида огоҳлантирилди

Роскомнадзор ва Россия бош прокуратураси Google (YouTube эгаси) ижрочи директори Ларри Пейжга Россиядаги сайловларга «аралашишга йўл қўймаслик» ҳақида огоҳлантириш мактуби жўнатди. Эътироз Алексей Навальнийнинг 9 сентябрь – ягона овоз бериш куни пенсия ёшини оширишга қарши акция ўтказиш ҳақидаги роликлари рекламаси туфайли пайдо бўлди.

Аввалига амалдорлар қонунбузарликка чақирувчи «оммавий акциялар олиб борилаётган» YouTube-каналларни аниқлашгани хабар қилинганди. Роскомнадзор ва бош прокуратура гап айнан ким ҳақида бораётганига аниқлик киритмаган.

Бош прокуратура вакили Алексей Жафяровнинг айтишича, мазкур огоҳлантиришда Google томонидан бирор чора кўриш талаби қўйилмаган.  

3 сентябрь куни Коррупцияга қарши курашиш фонди «Навальный Live» каналини қайта ишга туширганди. Фонд 9 сентябрь куни Москва, Петербург ва Россиянинг бошқа ўнлаб шаҳарларда пенсия ислоҳотига қарши акциялар ўтказишни режалаштирган.