Путин Керчдаги фожиани глобаллашув оқибати деб атади

Россия президенти Владимир Путин Валдай клуби йиғилишида Керчда юз берган фожиа глобаллашув оқибати эканлигини айтди.   

“Ижтимоий тармоқлар, интернетда бутун ҳамжамиятлар ташкил этилганини кўрмоқдамиз, барчаси АҚШдаги мактаблардаги фожиали ҳодисалардан бошланган”, деб айтган Путин. 

Унинг айтишича, интернетда ёшлар учун керакли контент жуда кам яратилади.  

“Беқарор психикага эга ёшлар ўзларига қандайдир сохта қаҳрамонларни яратадилар. Бу биз барчамиз, нафақат Россия, балки бутун дунёда жаҳондаги ўзгаришларга тегишлича жавоб бермаётганимизни англатади. Бу ёшлар учун фойдали, қизиқарли ва керакли контент кам яратишимизни англатади. Шундай бўлгандан кейин улар ёлғондакам қаҳрамонликни илиб оладилар”, деб таъкидлаб ўтган Путин.   

17 октябрда Керч политехника коллежининг 4-босқич талабаси коллежда бомба портлатиб, отишма содир этган. Охирги маълумотларга кўра, фожиа оқибатида 21 киши, жумладан 16 талаба ва 5 ходим ҳалок бўлган, 50 дан кўпроқ одам жароҳат олган.