Tesla Илон Маскнинг ўрнига янги номзод топди

Tesla компанияси асосчиси Илон Маск ўрнига директорлар кенгашининг янги раҳбари бўладиган номзод аниқланди. Бу ҳақда Tesla сайтида маълум қилинди. Ушбу лавозимни шу пайтга қадар директорлар кенгашига мустақил директор сифатида киритилган Робин Денхолм эгаллайди.

Айни вақтда Денхолм яна бир компанияда ҳам раҳбар – у Австралиянинг Telstra мобиль операторининг молия директори ва стратегия бўлими бошлиғи ҳисобланади.  

«Робин бизнинг жамоага қўшилгани учун унга миннатдорчилик билдирмоқчиман. Унга чуқур ҳурматимни билдираман. Ҳамкорликда ишлашимизга умид қиламан», — деб ёзди Tesla асосчиси Twitter саҳифасида.

Маск АҚШ қимматбаҳо қоғозлар ва биржа бўйича комиссияси билан келишувга мувофиқ Tesla компаниясидаги иккита раҳбарлик лавозимидан бирини тарк этиши лозим. У ҳозирда компаниянинг бош директори ҳам ҳисобланади.