Мамадали Маҳмудов Ўзбекистон Ёзувчилар уюшмаси аъзолигига қайта тикланди

Бугун, 16 ноябрь куни ёзувчи Мамадали Маҳмудов Ўзбекистон Ёзувчилар уюшмаси аъзолигига қайта тикланди.

ЎзА хабарига кўра, у билан биргаликда яна икки ижодкор  – Нортўхта Қилич, Дилшода Саидолимова ҳам қайта аъзоликка олинган.

«Турли сабабларга кўра уюшмадан четлатилган атоқли ижодкорларнинг Уюшма аъзолигига қайтарилаётгани амалга оширилаётган ислоҳотларнинг мантиқий давомидир», дейилади хабарда.

Маълумот учун, Эврил Турон тахаллуси билан ижод қилган Мамадали Маҳмудов «Бу тоғлар улуғ тоғлар», «Бўз бўри», «Ўлмас қоялар», «Туманли кунлар» ва «Ой нури» каби асарлар муаллифи ҳисобланади.

Айни вақтда 75 ёшда бўлган ёзувчи 2017 йил баҳорида, 17 йиллик маҳбусликдан сўнг озодликка чиқарилганди.