Фото : Россия мудофаа вазирлиги
Россия бош штаби бош бошқармаси (ГРУ) бошлиғи Игорь Коробов 63 ёшида вафот этди. Бу ҳақда Россия мудофаа вазирлиги маълум қилди.
Маълум қилинишича, Коробов оғир ва узоқ давом этган касалликдан вафот этган.
Коробов 1956 йилда Вязьма шаҳрида туғилган. Ҳарбий хизматни Архангельскдаги авиаполкда ўтаган. 1980 йилда Бош штаб бош разведка бошқармасига юборилган. Турли лавозимларда ишлаган, жумладан бош бошқарманинг хорижий резидентураларига бошчилик қилган.
Коробов ГРУни 2016 йил январда Игорь Сергун вафотидан кейин бошқара бошлаган. Генерал давлат мукофотлари, жумладан Россия қаҳрамони унвони билан тақдирланган.
Коробовнинг ортидан рафиқаси ва икки қизи қолди.
